Nu leh Pa tan a Krismas leh kumthar thuchah.

"Apa lo haw thuai rawh ka ngai tawh che nia".
Nu leh Pa dinhmun hi ava lo hlu in ava ropui tehlûl em. Fa te tan chuan Super Hero kan ni a, duh duh herchhuahna khawl kan nei a, an tan chuan khawvel mi hausa tak tak te ai hian kan ropuiin thil kan tithei fé zawk a ni.

Engmah nilo mah ila an duh duh an lam a; an dilna nih ringawt pawh hi chawimawina nopui khawvel mifing ten an dawn aipawn a ropui in a chhuanawm zawk a ni. Damlo natna khum a mu ten anmahni țanpuitu Doctor an mawmawh ai hian kan faten min mamawhna hi a nep chuanglo a ni. An tan chuan Doctor kan ni a, Teacher kan ni a, an mentor ropui ber kan nibawk a ni. A khaikhawm nan an engkim a engkim kan ni ti ila a sual tam lo ang.

Engtik ni ah emaw chuan

Hun leh ni te lo inher danglam a liamzel hian kan nunkhua hi heti khawp hian a sawi danglam ang tih ngaihtuah lo lék a kan len, kan vah kan vah lai hian, kan khawvel hi ava lo danglam tawh em tih hi ka ngaihtuah a. Hmanah chuan khuangchawi thla Thla êng te kha alo va êng bik em! Vangpui khua alo herchhuah meuh chuan nunhlui hmanlai chang tawh hnu kha thinlai ah a rawn thar leh a, ngaihbil awmlo suihlung aléng leh vung vung țan ta anih hi.

Ni e, kum tin hian a niziah rèng a ni. He khuangchawi thla hian zùn danglam tak zawng a nei anih dawn hi. Khawvel nawmsak mai nilo khawsak dan zawng a țuanna tlang dang leh tlang hrang hrang han fan chang ni te hian thinlaiah hian ilo thar leh țhin kan vangkhawpui lungkham neilo te a laitual kan lenna kha. Țuanțul vangin ngai hle che mah ila kir zai erawh kan rel thei silo a nih hi. Theih nise damlai hringnun kawng chhuk chho hi I tuallai a vuiliam kava chak tak em. Amaherawh chu kan khawvel damchhung khawsak intlansiakna ram ah hian kan tan hmun a awm ve silo. Lung tileng vangkhawpui mai ini e.

Ka theihnghilh thei thlawtlo a ni e

Khalai kawtthler zawl nuam tak kha ka thinlungah hian a cham reng ang tih reng ka ring ngailo. Mahse, tun thleng hian ka la theihnghilh theilo chu a nih hi. Ka nun ah hian thil pawimawh tak a lo in ziah tanna a lo ni reng mai.

Thirsakawr la thar hle a ni tih hriat tak ah chuan, khawvel ah hian a vawikhatna atana kan intawnna turin la khawr ve deuh hian a rawn inkhalh phei ve nawk nawk mai a. A pawnfen chhing tial mawi tak mai leh a T-shirt sendawng (pink) inhmeh tak mai chu thuhran amah a... amah timawitu ber mai leh mite thinlung pawh khawihtu ber mai chu a sakhmel nuimawi duhawm tak mai chuan kei chuah nilo thinlung a hneh thin a ni. Khami ni a a inchei dan kha ka mitthla ah hian a cham reng a sin. Tunge mawilo ti anga tunge duhawmlo ti ang? A hmuve chuan min hnial tu tur hi ka hrelo a ni. Ka tehkhin ber mai chu Pangpar sen mawi tak hrisel taka a rawn par chhuak tur hi ka tehkhin ber a ni.

Back to the old

Kei atan chuan "Back to the old" tihloh theih a nilo. Hun kha leh chen blogging khawvelah hun kalo hman tawh hnuin hna leh thil dang dang avangin ka chhunzawm theilo a, tuna ka ngaihtuah hian ka ui takzet a ni.

Khang hunlai kha a ngaihawm hle mai, han herlum leh tun teh ang. Wordpress lamah te ka han insawn ve tak na a, mahse taihmak miauloh vangin engmah chu kan nih phah chuanglo chu a nih kha, nunhluiah letin herlum leh zawk hi a tha maiin ka hria. Hma kan sawn ta viau ang chu ka ti thei biklo, mahse theih tawp chhuahin rilru a awm leh veizawng hrang hrang te pairal mai lo a, dahthat nan tal hman tum teh ang.

Kuthnu hluite han haichhuah hian a lunglenthlakin nun pawh ati hlim riau mai lo zu nia. Heite mai hi bultan leh nan chuan tawk mai tehse.

Ka khawnkhawm mai dawn

Kar tawp ah hi chuan han update ve hram hi tha ka ti si a,  mahse engmah ka rilru ah hian ziah tur reng alang pawn ka hre bawk silo. Ka han khawnkhawm ange.

• Lawmthu sawi alang tlat

Kartluan a ka hnathawh dan te ka han ngaihtuah let a, lawmthu sawina tur hlir a ni tih ka hre ta a ni. Office turin ka han kal a, kal kawng ah harsatna em em awmlo a ka han thleng ringawt mai thin te hi lawmthu sawina tur hlir a ni. Damtha tak chungin hna ka thawk thei a, nilengin ka awl changin ka online a(hunawl hnawhkhah nan), thian tam tak ka neih phah te hi ka va lawm tak em. Tlaiah inlam panin ka haw a damtak maiin ka han thleng leh a ava hlu tak em. Zanah hahchawlhna hun tha tak nei chungin chhungkua kan inkawm hlim a (zanah ka leng ngai meihlo), hahdam takin ka han mu siai siai mai te hi ka va lawm tak em. LALPA lawmthu ka hrilh a che.