Behind the Blog Title 'dr angel'

A hma daih tawh khan lo sawifiah tawh ila thra tur a nia. Ka lo ngaihtuah tamloh vang pawh a ni ange...chumai bakah a ho deuh em aw...te kati mai mai a. Mahse mi threnkhatin min han zawt ta zeuh zeuh mai a chuvang chuan heti hian ka han sawifiah dawn ta a ni.

Naupangte ka nihlai atrang tawh hian tupawh mai hian 'I len hunah enge nih i tum?' ti a min zawh hian ka chhandan chu 'Doctor' tiin a ni. Doctor nih ka duh leh chak nachhan ber hi chu an hlawhtam vang pawh a ni hranlo. Naupangte ka nihlai hian ka Nau chiah Malsawmmawia (Kei aiin Kum khatin a naupang) hi a hrisello thei hle a, ka lainatin ka khawngaih thei em em a ni. Damdawiin ah hian kan kal zing mawlh mawlh hle, Doctorte hlutzia leh trangkai zia hi ka hre chiang ve hle in ka hria. Kan tana an thratzia te ka hmuh hian mite tana malsawmna nih nawmdan tur hi ka lo suangtuah thrin a ni. Min duhsaklo tu deuh kan tawn lahin hetiang hi chu kava ni dawnlo ve aw...kati vawng vawng thrin a ni. He ka thinlunga ngaihsanna leh ngaihhlutna awm avang hian 'dr' tih hi alo chhuak a ni. Doctor tak tak ka ni tihna a ni love....chuvangin a hawrawp(letter) tranna pawh hi kati lian(Capital) duhlo a ni.

Mite tana trangkai ka ngaihsanzia chu nasa tak a ni,  a chhan ni a ka rin tak ber pawh midang mamawh em em bik ka nih vang a nih ka ring. Ka tetlai atrang tawh hian ka mit hi a thralo tawh a School ah te hian hreawm ka tih phah thei hle a ni. Thriante puihna tello chuan Black-Board a thil inziak pawh hi ka hmu thra thei thrinlo a ni....Midang hi kava mamawh bik tak em.....

Sunday School a kan zirlai ahte hian Vantirhkoh ropuizia te kanlo zir ve a....an thiltihtheihzia te chu kan han hriat hian Vantirhkoh nih chu a nawmhmel hi ka ti thei em em a ni. Mite venghimtu an nihnate hian rilru ava hneh tak em....Chumai bakah an hming 'Angel' tih hi nalh ka ti ngawih ngawih bawk a ni. An ropui em avang leh tehkhin chi rual ka nihloh avangin in a hawrawp(letter) hmasaber 'A' pawh hi ka ti lian(Capital) duhlo a ni. Heta tang hian 'angel' tih hi alo chhuak ta a ni. 

dr angel