Kumhlui thlah zan dangdai.

Kan college campus chu dar 6:00pm ah ka chhuah san a, chu tih lai chuan Kolkata khawpui chuan kumhlui liam tur thlah tur leh kumthar duhawm tak lo her chhuak tur hmuak tur chuan an in buatsaih mup mup mai a. Kan college bul lawk a three star hotel lian tak mai “Hotel Hindustan International (HHI)” kawtthlerah chuan tlei rawl te te leh nula tlang val rual chu an lo awm thup mai a. New Year Party HII a neih tur a an entry te an lo buaipui sap sap hlawm a. Chutih lai tak chuan kei hian khawi hmun ah nge hman ka tum ve le tih hi ka rilru ah hian a rawn lang thut maia. Mahni a inluaha khawsa ka nih avangin hetiang hun a mahni chiah a han awm rek rek mai chu dik dawn lo riau mai tih te kan ngaituah tel bawk a.

Tichuan ka in lam pana ka haw mek lai chuan, ka mobile hi a rawn ri ta ral ral mai a. Kan en chuan kan thian nu pakhat hian min lo call hi a lo nia. “Zanin lam te , khawilama hman nge I tum a?”  arawn ti a, kei lah chuan hman na tur em em pawh ka neih loh thu te kan hrilh hnu chuan an in lama phei ve tur leh zanriah kil ve nghal tur chuan min tita a. Ka haw vang vang a in kan thlen meuh chuan dar 8:00pm a lo ri ta der mai a. Tichuan kan inbual sawk sawk a, ka Kumhlui thlahna hmun tur lam chu ka pan ta a.

Zan in zet chu a dan pawh a dang khawp mai. Ni danga hmuh ngai loh deuh deuh pawh hmuh tur lah a tam. Kawng sir a lo infawp ta ngawng ngawng mai te, zurui buaina siam tawk lah hmuh tur an awm nual bawk. Tichuan dar 9:00pm vel ah chuan ka va thleng phei thei ta a. Ka thleng phei deuh chiah tih ah zanriah kil hawna te kan han nei ta nghal a. Zan in zet chu nikum lamte pawh a ngaihawm rum rum mai. A khawhar thlak ru ang reng hle mai bawk si a. Ka va lennate inchungah chuan Vai ho chuan party siamin an ri ve hat hat bawk a. Chutih lai chuan Facebook-a online bak chu tih tur a awm lo  khawp mai. Tichuan kan han titi nek nek, a hun chu kal ve ta zung zung mai a. Kumthar pawh chu reilote ah chuan kan hmuak thleng ta mai a.  Hal mawi chi hrang hrang leh hal puah chi hrang hrang a puak ta chuaih chuaih mai bawk a. Kum 2011 chu kan lo chuang kai ta der mai . Ka Facebook status pawh chu ka update nghal bawk a . Kan eitur siam vete pawh chu kan ei ve ta a. Sana kan en chuan dar 2:00am a lo ri der tawh mai a. Haw zai ka rel ta a.

Pawn kan chhuah chuan a lo vawt vur mai a. Kawngpui kan pawh chuan motor pawh a la tlan zut zut mai a. Taxi pawh an lo la awm nual mai. Mahse ka in thlenga kal tur chuan zan a rei tawh bawk nen fare an charge to thei khawp mai. Rs 150 chiah ka ah tawh avang chuan tih ngaihna ka hre lo hle mai a. Kan nghah deuh vang vang hnu chuan cycle rickshaw pakhat hi a rawn tlan phei a Bakrimgarh atanga Tollygunge metro station thleng chu Rs 50 in kan inbe rem ta a. Chu rickshaw pu lah chuan kawng kawmkar tak tak la hriat ngai lohah chuan min kalpui leh nghal a. Amaherawh chu kha rickshaw pu nana na kha chu ka hlaulo ve khawp mai. Tichuan kan kal zel a Tollygunge metro station chu kan va thleng ta a. Chu ta tang chuan taxi lak tur chu ka zawng leh ta a. Taxi pakhat lo ding hi ka va pan ta a, a driver chu a lo induh khawp mai tichuan taxi dang lak tum a thui vak lo ka pan hnu chuan min rawn au leh a ka va kal ta a. A thianpa pakhat taxi hi a lo ni a, tichuan a thianpa chuan taxi ah chuan min luh tir ta a. Mahse kal lawk lo chuan chupa chuan “Kan thianpa nghak lawk ila , a lo thlen hunah kan kal dawn nia. A lo thleng tep ang”, a ti a. Tichuan rei vak lo hnu ah chuan kan mi nghah pa pawh chu a lo thleng veta maia.

Tichuan an pathum chuan an inbia an inbia a, “Sawtah kan va kal lawk nga a rei lo ang lo thu char char rawh kan rawn thleng leh vat ang” a ti leh ta a. Taxi dang vang tawh bawk si, an rawn let leh chu ka nghak ta ringawt mai a. An thang rei ta riau mai a, thil tha tak ti tur lo chuan tun ang hunah chuan an bo vang vang lo tawp ang tihna rilru te ka nei ta a. Tichuan minit sawmhnih vel hnu ah chuan an rawn let ta a. Taxi fare kan zawh chuan Rs 120 an ti a. Mahse Rs 100 chiah ka nei tawh tih ka hrilh a. An ngawi deuh thap hlawm a, mahse an zinga pakhat chuan , “ Pawilo New Year a nih  hi mi tana thil tha tih tur”  hi a rawn tia. Tichuan Rs 100 chuan an rem ti ta a.

An zinga pakhat chuan min be ve bawrh bawrh maia, China lam mi emaw ka nih te an tia. Kolkata ka awm chhan te chu min han zawt kual duah a. Ani hi palian tak chu anilo ve khawp mai. Kum 23 bawr vel a nih hmel a lehkha zir chhoh dan vel a sawi danah chuan. Tin adang pahnih te hi chu kum 25 chu an pel chiang tawh khawp mai a, driver phei chu nupui fanau a nei tawh tih a chiang. Tichuan a te ber nen chuan kan ti ti deuh reng a. Rei fe hnuah chuan an pil bo vang vang chhan chu a lo lang chhuak ta a. Ate bera chuan ‘TIP’ I zu ve ngai em a rawn tita thut mai a. Tleirawl laite kha chuan lo ti ve zauh zauh thin mah ila ka zuk ngailoh thu chu ka hrilh a. Tichuan an zu khu ta luih luih mai a. Rei vak lo hnuah phei chuan an rui ta hlawm khawp maia. Ka in kawng lama kal ta lo chuan Behala lam pan chuan an tlan ta daih mai a. Amaherawhchu ka in kawng kha Behala lam tang chuan a kal theih tho avang chuan kawng dang zawk a thlang a nih hi ka ti liam ve leh ta mai a.

Hetih lai tak hi zing dar 4:00am vel a ni tawh a. Chhum lah chu a zing chuk mai a. Kan tlan chak hle mai bawk a. Kan kal na lam kawng atang chuan kan veng luhna pen zeuhna lai tur hi a awm a. a thim bawk si nen ngun deuh a kan en pawh khan kan veng pen na awm kha avang ta riau mai a. Kawng nilo ah kan kal ta emaw ka ti ta hial mai a. Kan tlan zel a kan tlan zel a taxi meter kan en chuan cheng 150 lai ka chawi der tawh mai a. Mahse Rs 100 an tih tawh avang khan engtin pawh rawn ti se mahni rau raua inrintawk ve lai ni bawk a, an rui deuh tawh bawk nen ka hlau lo ve khawp mai . Nakinah chuan kan tlanna lai chu in pawh awm tawh mang lo ramhnuai niawm tak tak hmun ah te hian kan tlan ta a. Ka ngaih chu tha tawhlo khawp mai a. Ka mobile leh ka ATM card chu ka mawza hnuiah chuan ka thukru ta daih a. Ka ngaihthalo chuan driver chu kan kalna lai hi ava mak ta ve tiin ka zawt ta a. Mahse a ni chuan kan kalna lai tur a hriat loh thu a sawi tatlat mai . An zinga atebera bawk chuan driver chu let leh turin a ti leh ta a. Driver pawh chu a let ve leh mai bawka. Chiang zeta kawng kan en hnu pawh chuan kan kal na lam chu ka hrelo reng reng mai a.

Nakinah chuan kawng ah hian pa pakhat hi a lo awm a, taxi chu tih din tir in kan veng pan na kawng chu ka zawt ta a. Min han hrilh hnu chuan kan lo tlan pel nasa tawh hle mai a. Kan let phei leh ta vang vanga . Meter kan en leh chuan Rs 200 lai chawi tur chu ka nita a. Tichhuan sign board vel kan en phei zela kan veng penna kawng chu ka hmu ta hlauh maia. Kan veng lam kawng kan peng tur chu driver chu a kal tha duh ta tlatlo maia Rs 100 in kan lo inbe tawh bawk si a. Mahse an han inbiak nak nak hnu chuan a kal leh ta hram a. Thla pawh a muang ta sawng sawng mai a. Ka in kawtah chuan ka chhuk ta a. Driver hnena Rs 100 ka pe chu a thin a rim ta khawp mai a. Mahse atebera bawk chuan kal mai rawh pawi lo tiin a lo hrilh a. Ang bawrh bawrh chung chuan an kal liam ta a.

Him taka in ka thleng leh thei chu ka lawm hle a, inchhung ka luh hnu chuan kum liamta a harsatna lian tham tak tak awmlo leh kumthar him leh dam taka Pathianin min hruaina avangin lawmthu sawina te ka nei ta a.

Eddie Colney