Chakai khawrhlo nun

Chakai hi kan hretheuh awm e, atui ti a duh tak tak ho hi chuan an ngaihlu in Vawksa aipawh a duh pawh an awm nawk awm e. Amaherawh chu ka nive lemlo. 

Chakai khawrh tur chuan Lui ah kal a ngai a, Lui chu a hla duh phian lehnghal a, a kalkawng lah nuam tak avang khawp mai. A hmun han thleng ila alo chhengchhe em em a, thalai la chak ve tak tanlo chuan kal mai mai chipawh a nilo. Lui ah chuan chetsual palh a hlauhawm em em a, fimkhur tak a chet a kal vel angai a ni. Kan chesual palh a nih chuan lung hmun leh lengkir te pawh awm thluahna a nih thin avangin nunna hial chan te pawh hlauhawm tak a ni. 

Kan kalchhan tak Chakai khawrh chu han tan ila, lung lian leh te deuh te phawkin Chakai chu kan han khawrh tan ta a, a hahthlak duh em em a ni. Lung lian ve tak tak te phawh angaih thin a vangin ban tha a kham duhin a rawl them thum hial thin a ni. Lung kan han phawk a, tui nu deuh karah pawh alo dum deuh nal nal kan hmuh chuan kan han tham risk thuai a, chakai alo nih ngei a, a bawppui pawh lian tha ve tak anih chuan a hlimawm duh em em a ni. Man sual chang in mi te an han cheh nawk nawk chang lah alo awm bawk a, achang chuan min chep hliam hial thin a ni. Leinawi nen a tham tawp tawp kan nih thin avangin kan han silfai ang thuak thuak a, “ai-ip” ah kan han thun zan hnu chuan a ip chu kan han pawt zip leh hmak ta thin a ni. 

Pianna ram/khua fan thunawi

Kum 2002 khan zirna runsang kai turin ka pianna khua Muallianpui chu chhuahsan in; kan Zawlkhawpui lam ka pan a, thangkhatlian zet alo liam ve ta reng mai.

Khami kum atang a tun inkar ah hian ka haw khat hle a, vawi 5/6 vel bak ka haw lo in ka hria. Chutiang taka haw zung zung thei talo chu mikhual chan tak hi ka chang ta in ka inhria a, hmelhriat an tlem tulh2 a, a cheng a te zingah pawh min mikhual hmuhtu an tam ta khawp mai, a awmlo hranlo e.

Panlai nun chen a ka tualchaina kan khua hian ka lung min len bang thei dawnlo anih hi. Kawtlai a in Kawihnawk a, Sephung insik tir te, daipawn hmin bawhpét te, buk lem sak a; in sipai lemchan nun te kha a ngaihawm banglo a ni.

Kan nun hi

Lung delh loh thing delh loh ta chu Pathian zarah kum 30 lai chu he khawvel ah hian kalo khawsa ve ta reng mai. Min kaihhruaina ah hian vuina tur reng ka hrelo a, lawmna tur hlir zawk a ni. 

Retheihna awmzia hi hrilhfiah ngailo in ka tawng tawh a, hmuhsitna awmzia pawh a awmzia hrechiang ber tur te zing ami ka ni hial ta ve ang. Kalo beidawng em em tawh thin a, chutihrualin beiseina nun in min tihchak zia pawh ka hre bawk a ni. He khawvel hreawm hi khuk bosan daih duh hialna nun kalo nei tawh a, khawvel a kalo piang ve ta mai hi ropui ka tih leh em em bawk a. Mihring nun kawng chhuk chho mai nilo kual kikawi thleng hian kalo tawng ve tawh a ni. 

Hmangaihna (Love)

Hmangaihna hrilhfiah itum chuan hmangaihna hrang hrang I sawi tel angai ang.
Chung hmangaihna te chu a hlawm thei ang berin han thliarhrang dawn ta ila: Pakhatna ah chuan chhungkua, láina leh țhian hmangaihna ni sela. Hei chu sawifiah em em pawh angailo turah dah ila.

Pahnihna ah chuan nulat tlangval in hmangaihna; heihi hmangaihna tiin kan han sawi ve tak na a, sap ho in #romance an tih ang hi ani zawk mah a, he romance mizoțawng a a ang teuh ber chu #inngainatna ti ila a nihna tak paw chhuak chiahlo mahse a teuh ber awm e. He romance hi alawm nula, tlangval, tleirawl leh rawlthar tamtak tluk chhiatna ber chu. He romance(inngainatna) hi hmangaihna emaw tiin sual kawng thuk tak dai tirtu hial alo nita reng țhin bawk a, he romance hian daih hun alo neih si avangin mi tamtak laklawh deuhin an nun phah anih hi. Fimkhur hle rawh.

A tawp berah chuan nupui pasal in hmangaihna hi a ni. He hmangaihna hi chuan a daihreiin damchhung leh chatuan thleng pawhin a daih thei a ni. He hmangaihna hi a chung a kan sawi tak romance ațang a lo piang tho kha a ni a, mahse romance zungzám khan a hruaisual velo a ni. Hmangaihna chauh nilo khawngaihna te, lainatna te leh rinawmna thlengin a keng tel a ni. Hmangaihna dik leh tluantling kan ti thei awm e.
Sawifiah vek erawh a har khawp mai tawnfiah chi a ni. Duh tawk mai teh ang.

Panlai nun

Tihian ka dâwn a,
Panlai nun thianghlim kha,
Kirleh thei tawhlo a liamta kha,
Thinlai ah tharin ngaih ava zual em.

Khang hunlai khan,
Nun a mawlmang a,
Nun a thianghlim a,
Nun a zalen a,
Mahse kan va hlim si em!

Panlai nun kha,
Ka chhingmit a mih hma leh,
Ka lungphu hi a phut det det chhung chuan,
Sawiban zai reng ka rel dawnlo.

Bakbakte-a thukhawchang - 1

Ngaiteh ka dâwt a,
Ka ďâwt zo thei silo.
Dawlh ka tum a,
Ka dawlh thei silo.
Chhâk ka tum a,
Ka chhâk thei chuang silo.

Ka zuâm a, ka zuâm em em a,
Ka buan a, ka buan vak vak a,
Chaih ka tum a, min chaih ta zawk si,
Hnehtu nih ka tum a, min hneh ta zawk si,
Ka suangtuah a, ka suangtuah vak vak a,
Ka zuam, ka buan, hneh tuma ka chaih a;
Ka suangtuah chuan min tudai ta!