“Ni e” tiin mi tam zawk chuan min tawmpui ngei ang ka ring. Ani taka panlai nun ngaih hi khawsak harsa leh rethei tè tan pawh hian a reh thei dawnlo a nih hi. Eng vanga ngai nge kan nih a, eng vanga thlahlel nge kan nih tih lam erawh kan ngaihtuah zawm kherlo mai thei a ni. Kha panlai nun khan danglam bik riauna a nei tidawn ila, chutiang han sawi tur em em kan hre kherlo mai thei bawk a. “A ngaihawm ve tawp ani mai” ti a sawitu pawh atam zawk kan nih ka ring. Mahse ngaihtuah thiam ang tawk tawk in han thai kawi dawn teh ang.
Mizote hi Kristian kan nih hma daih kan thlahtu pi leh pu te atang tawh a thil lo zeldin vak vak thin kan ni pawhin a hriat theih a. Pathian khawngaihna zara Kristian kan nih tak hnu a “kan beisei Van Kanan” kan tih tak fo Vanram kan beisei ang tho hi kan lo beisei ni hian ka hre thin a. Chu kan beisei chu enge tiin kan in zawt mai thei, chu chu PIALRAL hi niin a hriat a ni. Pialral ah chuan enge awm kan tih a kan sawifiah thiam dan ber tur chuan “fai sa rin” hi a ni mai awm e. Fai sa rin hrethiamlo kan awm erawh a rinawm loh rualin han sawi ve hrim hrim ila. Engmah thawh ngai tawhlo a, mahni duh tawk tawk ei leh in ti ila a fiah mai awm e. Ava nuam in ava hahdam dawn em!
Chutiang deuh chiah chuan panlai nun ah pawh hian lungkham em em neilo a, zalen taka kan lo nun thin vang khan a nuam kan ti a, kan thla a muang a, kan ngai ta thin niin a rinawm. Nu leh pa te neih leh phak chin pawh ngaihtuah lo khan kan duh duh kha kan ngen tawp mai thin a. Nu leh pa tamtak rilru hah thin tur zia leh mangan thin tur zia hi kum a kalve zel takah chuan a fiah chho kuar kuar ta mai chauh a ni. Panlai pangchang thlamuanna nun khan nu leh pa te a ti thlaphang a, rilru hah tak tak alo siam teuh mai zawk alo nih hmel ta a ni.
Mahse kha panlai nun zalen tak kha angaihawm em em si a. Khatiang nun ngaihawm kha puitling nih hnu pawh hian alo siam theih reng dawn ni te hian a hriat theih a ni. Nun zalen tak nei tur chuan rilru dik kan put angai a, midang tana malsawmna thlentu nih duhna thinlung atang chuan kan rilru dik put chu atakin kan tifamkim thei dawn a ni. Midangte tana malsawmna nih duhtu chu eirukna lakah a fihlim anga, hlemhlétna te chuan a nunah hmun reng an chang dawnlo a ni. Diklo taka tih duhna khan an rilruah hmun achang dawn silo. Chutiang a kan nun theuh chuan nun zalen leh nuam tak PANLAI PANGCHAN NGAIHAWM ang kha kan lo nei let leh dawn zu nia.
Kum 2023 ah mite tan malsawmna nih duhna thinlung pu chungin ram nuam i siam ang u.
KUMTHAR CHIBAI VEK ULE.
✍🏻 Fanai Ruata ©️
