Ka nun hian angai em che a ni.

Kei rethei tlinglo leh tê ber hi,

Harsatna tin rêng ten min delh a;

Tui anga baw tawh hnu ka nun hi,

Hahchawlhna zawngin a vai ruai thin.

Kei kherlo pawh hian rethei minti chu an tam ve ngawt in ka ring, mahse vannei minti tu pawh an awm ve tho âwm bawk e. Thingtlang khaw te reuhtê atanga pianga seilian tan chuan khawvel nawmchenna te pawh beisei phak a nilo mai nilo in kan hmuphak manglo zawng a ni e.



Chhungkaw harsa tak atanga seilian ka nih avang hian thian pawh hi ka kawm tamlo hle a, Thiante zingah pawh hian ka inthlahrung thei em em a ni. School ka han kal tan ve e tih atangin mite hmuhsitna hi ka tawng nasa thei em em a, ka kal hmasak ber ni atanga karkhat vel hi chu thutna pawh ka neilo a, school bangrel ah hian ka thu ve tawp mai zel a ni. Mite hian min chhiah nawmnah thei em em a, tah pawh hi ka tap ve ngam manglo a ni ber mai. Mahse chuti chung chuan school kal hi ka chak theiin ka phur thei em em thung tlat si a ni. Thilthar han zirte hi nuam ka ti em em a, beisei ai tak chuan kan zirlai chu ka thiam chak ta viau zel mai chu ka hlim thei khawp mai. Ka retheihna chuan min dallo khawp mai.

School zirlaibu tur leina te chu keini chhungkaw tan chuan a va hautak êm, kan thenawmte nau hi kei aia upa deuh chiah hi a awm a, chumi lehkhabu hlui chu ka ringchho thei ta char char mai kha ka va han vannei tak êm. Kan class rêng rêng ah khan a lian pawl hi ka ni ngailo hrim hrim a chuvang chuan tih duhdah pawh hi ka tawk nasa bik hlê a ni.

Kan inchhung ah chuan kum tawp lampang ah hi chuan Christmas thawmhnaw thar te chu sawiloh eitur mumal hi kan nei ngai manglo a ni. Vaimin ringawt kan rin changte hi a awm ta fo mai. Kei chuan hreawm tihna em em pawh ka neilo, mahse a hreawm ka tih ber zawk chu ka nu leh pa te rilru hreawm hmêl hmuh kha a ni. Ka la theihnghilh thei thlâwtlo a ni e. Mahse chung kan retheihnate chu minti beidawngtu nilovin tumruhna min petu a ni ta zawk zel te kha Pathianin a ka tana a ruat a nita hial in ka hre ta zawk a ni.

Rethei tê mah ni ila kan han rawlthar chho vel chu thian kawm ten an zir vaklo bawk nen kan han sual ve bâk bâk a, khawtlang hruaitute pawn min zilh kan ngaive ta zauh zauh mai. Mahse khang hunlai keini rual ho kha chu kan ni deuh vek in ka hria, a fel deuh hlek te erawh chu tunlaia kan tih dan in an tuai deuh hlek hlawm in ka hria. Khang kan lo nundan zawng zawng te kha kan hmalam hun atan a pawimawhna pawh kan hre pha tawp silo, beidawnna ah min hruailuttu a ni ang tih ngaihtuahna chang hria lah kawn awm heklo. Kan nung ve bâwk bâwk kha a ni ringawt mai.

Rethei tê chung pawha kan theih ang ang a kan han sual ve bâwk bâwk mai te kha siamthat theih a ni tawhlo tih rêng kan ngaihtuah dêr silo. Kan han harhchhuah meuh chuan khua alo tlai dêr tawh chu niin, kan duh dan dân a kan lo nun ve bâwk bâwk na khan min han vawlet tan der mai. Keimahniin kan tuar thei bawk silo, mahse tuarpuitu tur tumah kan nei chuang silo. Chhungten min ngaihsak lova, enga tân mah min ti lova. Min ring heklo. Kan han felve deuh lahin min ringhlel tulh tulh mai amaw tih tur a ni zawk hial bawk si. Kan nun chu ava hahthlak tak em…

Kan nun lo hmandan zawng zawng te kha kohkir leh duh mah ila a theih tawh siloh. Kan nun chu hahchawlhna zawngin khawvel lamah han tlan teh mah ila, hahdamna famkim kan hmuchaung bawk silo. Beidawng tak hian kan vai vel ruai a ni ber mai.

Ka nun ruak luahtu awmlo beidawng hian,

Bo pila phatsan che a zuam nem le;

Lalpa min khawngaihin min luahkhat la,

Ka nun hian a ngai em che LALPA.

Kan nun hi aruak ngawih ngawih a, enge kan beisei pawh hrelo hian kan kun ngawih ngawih hi a ni ber mai. Beidawnna ruamah kan tâng chu alo nider mai hi a lo ni a. Achâng chuan khawvel sualna/nawmchenna lamah han tlan ral thak duh hialna thinlung te pawh kan pu hial a ni. Mahse chuti khawp a beidawng pawh chu ni mahila min hmangaih êm êm tu LALPA chuan kan nun ah chuan tui halna hmangin minla chelh ding hram hram ni ber hian ka hria. Chu tui halna chuan amah neih duhna thinglung hial minpe leh bawk a, ava tha tak em kan LALPA hi.

Amah beisei ngam tawh lo tur khawp hiala sualna nasa tak neite tan pawh chuan alo la pangai rengte hi ava ropui tak êm. Chutah a hmangaihna chu kan tan pawh ala ngai reng a nih tih kan han hriat chuan a hma ah kunin a khawngaihna dil duhna thinglungte minla pe lehzel bawk nen, han bosan thieh hi a ni tawh mawlhlo. Hetiang em em a hmangaihna nasa hi tunge neive angle? Kan LALPA chuah hian a nei a ni. A hmangaihna a kan tlukluh tak tak chuan kan thinlung/nun ah hian LAL atan kan duh ngawih ngawih a, kan nun hi luahkhat turin kan duh a kan ngai em em ta zawk a ni.

Kan harsatnate hi engvangnge?

Keimahnin kan thlen leh siam a ni.

Sawitur rêng kan neilo kan zak e;

Kan hmai hupin kan hawi ngam love.

Kan nunah hian harsatna tamtak hi kan tawk thin reng a ni. Heng kan harsatna tawh zawng zawng te hi keimahni thiltih vang a kan chung a lo thleng a ni tih lah hi kan hre der silo, nge kan hre duhlo zawk? Heng kan nun a hatsatna kan tawh zawng zawng te hi keimahni vang ani tih hriain, sawi buai tur engmah kan neilo a ni. Zak a kun ngawih nghawih tur kan lo ni.

A ni rêng asin harsatna kawng hrang hrang kan han tawk a, vanduaina kan chunga lo thleng ringawt emaw kan ti thin. Mahse keimahni thil tih vang liau liau a kan chunga lo let  a  ni tih hria in insiamthat na atan han hmang zawk tahlauh ila kan LALPA tum dan chu a lo fuh viau zawk thei  a ni. Zak ngawih ngawih tur kan nih laia amah kan han dem ta daih zawk thinte hi ava pawi tak em. In enchian chu kan ngai khawp mai.

Kross ah kan tan I nun hlan lo la,

Kei misual tân damna a awmlo;

Mahse maw ka LALPA thatzia hi,

A vuakna vuala tihdam kan nita.

Kan tan Kalvari tlang Kross ah khan a nun hlan lo se chuan kan chan tur rapthlak zia hi a hretute kan ni awm e. Kan tan chuan amah nen inzawmna tur rêng a awm tawhlo, mahse chu chu ngaingam lovin kan chhandamna atan a Fap mal neihchhun chu a hlan ta  a nih kha. A thihna chu kan tan damna a lo nita zawk a ni. Kan LALPA hi chu ava han tha tak em, Kan damna turin a nin a tuar a, a vuakna vual te avang chuan tihdamin kan awm ta.

Kan LALPA min hmangaihna hi hai der a, amah hawisan tur kan nihlohzia hi in hre chungin a rawng chauh bawl tur hian kan in siamthat hi a va pawimawh tak em..

Bethsy Lalrinsangi sak a nia ka thinlung hi a khawih em a ni.

Follow @marvinfanai