Ka veizawng tlemte.

• Tuihâwkin luan ngaihna a hrelo fô mai hi.

Nia, inti ve tho mai  thei, ruah a han sur tak tâk hi chuan kan Aizawl khawlai hi tuihâwk hian a khat a ni deuh ber mai. Tu thiamloh nge? kan in enfiah ava pawimawh tak em. Tuihâwk hi tui luan kawrah a luang tur a ni a, mahse luanna tur mumal pawh awmlo in kawngpui ah a khat hnûr zel mai chu a nih hi. Kan sawrkar department lam hian hma han la sela a lawmawm ngawt ang.

Chumai bakah mipui hi kan pawimawh em em a ni. Kan hnawmhnawk kan thehthang dan hian kan mizia a tilang chiang khawp mai. Kan hnawmhnawk te kan paih fimkhur a, a paihna tur hmun dik tak ah kan paih zel chuan khawpui thianghlim tak kan nei ni mai tur hi a ni a, kan duh duhna ah thehthang mai mai lo in sawrkarin a paihna tur a siam ah chiah hian paih hram hram ila a tha khawp ang. Hei hi kan duty pawh a ni reng a ni. Sum sen belh vak ngailo a changkanna tha tak a ni tih hi hre reng ang u. Chuan kan hreiselna te pawh in a lo that phah dawn a ni. Kan lo hrisel chuan tullo a kan sum hmanral tam tak te hi kan khawl thei anga, kan tu leh fate tan malsawmna thlentu kan ni mai dawn a ni.

• Kan zirna chungchang ah hian.

Tunlai khawvel changkang zel ah hian mite hian zirna hi ka uar tawlh tawlh mai bawk si a, keini Mizoram ah ngei ngêi pawh kan intlansiak nasat zia chu kan hre theuh awm e. Mahse kan intlansiakna kawngah hian mî mitmei veng lêklo hian kanlo tlan ang tih hi kan ngaihtuah telve hi ava pawimawh em. Zirna tha chu kan duh teuh mai, mahse zirna tha nei tur hian a dik leh diklo pawh thlulo in kan tlan ta pawp pawp a ang ta hle mai. A zahthlak tihna chang kan hriat a pawimawh hle ang.

Technical entrance exam result chungchangah leh Board exam result chungchangah buaina engemaw neuh neuh zahthlak deuh deuh kan hre ta fo mai hi kan in en chian a pawimawh khawp mai. Zirna kawngah tal hi chuang dikna hi LAL hramse ka va han ti tak em. A tling chu tling mai se tlinglo chu tlinglo ngam maise ava tha dawn em. Kan nu leh pa te thiamloh a ni hiallo maw âw ka ti mai mai a. Kan nu leh pa te hian kan tana tha tur an duh lutuk na kawngah hian khaw hmulo lêk a an tlan a nih chuan atuar tu tur chu keimah ni leh kan fa te lehzel an ni tho tho tih hi i hre theuh ang u.

• Zûk leh hmuam chungchâng.

Mizote hi zûk leh hmuam ti nasa ber pawl kan nih ngei ka ring ve ringawt a. Kan taksa tan a thalo pawh hi kan ti char char theizel tho mai hi a makve bawk em a ni. Mahni in hmangaih hi a pawimawh khawp mai. Nangmah i in hmangaih chuan i taksa tan a tha tur kha i ngaihtuah tur a ni a, i taksa tan a tha tur chu i chhia leh tha hriatna khan a hrilh thei che a ni. Zûk leh hmuam hi a addict theih na meuh mai, mahse tun tak tak chuan engmah hi han nghei/sim theihloh tur hi a awm emawnile ka ti mai mai thin.

Zûk leh hmuam hian kan nunna atan pawi nasa takin a khawih mai bakah SÛM tam tak kan khawhralna a ni a, han tilo chiah ila chuan hma nasa takin kan sawn ngei ang. Tin, zûk leh hmuam tihloh hi SÛM SEN BELH NGAI MIAHLO A CHANGKANNA a ni tih hi hre theuh ang u.

• Changkan dan i thiam ang u.

Tunlai khawvel changkang zel ah hian hma kan sawn ve zel bawk a, kan thil hmuh leh duhzawng chu kan tum chuan kan hmaihlo hlawm hle in ka hria. Mahse kan changkan dan ah hian a chintawk hi kan hriat ava pawimawh em. Mi in a mamawh bak, a duh duh  lei leh nei theia a awm chuan tunge sawisel vak vak chuang ang. Mahse nei leh neilo a kan duh zawng zawng neih kan tum thin hi a tha ber lo a ni. Kan mamawh dan leh phak tawk ah hian changkan dan i thiam ang u.

• Rinawmna lamah kan tlahniam ta hle mai.

A ni khawp mai, hmanlai kan pi leh pute hunlai kha chuan Thingfak in kawngka an kalh mai thin a nih kha, tunah chuan a tha ber ber chi pawhin kalh mah ila kan thlâ a muang tawh chuanglo. Hei hi engvang nge ni ang? Rinawm taka ka tih tur theuhte kan tih chuan kan Pathian hian kan tan malsawmna hi a dah a ni. Chu chu i ring ngam ang u. Mizo nih tinuamtu RINAWMNA kha i chawi nung leh ang u.

Awle, i duhtawk phawt mai teh ang kan la sawi leh dawn nia.

Follow @marvinfanai