Tunge maw i nih a, ahriat reng che le…?


Thiltha tite leh Siamtu duhzawng a awmte hi chu malsawmna dawngtlak ngawih ngawih an ni a, mahse thatna leh mite tan tangkaina reng neilo te tan hian eng malsawmna nge maw awm ve ta angle tiin ka ngaihtuah mai mai thin a.


Ni eeee, iti ve tho mai thei han ngaihtuah chiang teh. Thenkhatte chu an nu leh pa te pawh kohhran leh khawtlang ah pawh a kul atai a inhmangte an ni a. Chutiang chhungkua atanga lo piangchhuak a, tette lai atanga nu leh pa, pi leh pu ten nundan tha tin reng nen a an kaihhruai, chhungkaw khawsak chungchang ah pawh mite neih ang chu harsa em em loa neive thei zel mai te an ni bawk a. Zirna runsang an han kai chhohna ah pawh a rualpawl tawk chunglam ni thei zel khawp an ni leh zel bawk nen. Nu leh Pa te kohhran khawtlang a milar anlo nihsa avang in an tan pawh kawng chu a eng sa khawp mai.


Naupangte an nih lai atanga naupang thuawih ti a tlangval ho zinga lar thin, anlo thanlenna zelah pawh tleirawl sual em em pawh neilo te tan hi chuan kawng hi chu a engsa em em hian in hre ve tho ngei ang. An vanneihna a kaltluang laklawh emaw tih mai tur in zirna sang zawk te pawh chhungte zarah School tha tha ah an kal leh zel thei bawk a. Chu an zirna hmunah pawh chuan Zirlai hruaitu te thleng thleng in an han ni chho leh zel bawk nen. Mite hi anva hmelhriat vak hi angai tawhlo, anmahni hmelhriat chak hi an tam zawk emaw tih tur hial an ni ta mai lehnghal a. Sawrkar hruaitute leh mi challang deuhte dawr a ngaih chang pawhin an thehchhuah ber anla ni ta fo mai lehnghal, kawng ava eng em an tan chuan.


Master degree hial neiin eizawnna lamah ke an han pen tan a, sawrkar hna pawh an thuvuak thlak pawh sangtak chinah an in thun thei leh ta zel mai a. An thiam bik em em vang pawh ni chuanglo in nu leh pa te zarah leh hmelhriatte zarah heng dinhmun hi an chang thei ve tho bawk chu nimahse an nihna in alo tlinve tho bawk vang pawh a ni ange. Tlukloh en a en tu chu mitam zawk an ni ta der mai.


Sorkar hna nilemlo sumdawnna lamah pawh nu leh pa te lo inkhawlsa atangin sang tak atangin bul an tan theih avangin hlawhtlinna pawh an tan chuan ban phak mai ah a awm a ni. Tunlai intlansiakna sang tak ah pawh a chak pawl an ni leh zel bawk a. Miten harsa taka an thawh chhuah kha anni tan chuan harsa lutuk loin an nei mai thei zel a ni. Naupangte in mite zah anlo ni der mai….


Khawvel nawmchenna lamah tlan em em loin, sualna kawng ah phei chuan mite hriatloh na lamtak an ni lehnghal. Kohhran leh khawtlangah pawh an han in hmang ve dek dek a, an in hmang nilo in kohhran leh khawtlang hian a hmang zawk amaw tih zawk tur hial a ni. Rawngbawlna lamah pawh an thleng sang chak hle mai, naupangte in kohhran Upa an ni der mai. Khawvel hi an tan ava nuam dawn bik em…..


Tun a ka han sawi tak mi angte tan hi chuan hriatthiam ava har dawn em kan thupui hi. Malsawmna dawngtlak an ni ngawih ngawih iti ve ngei ang. Mahse a lehlam zawng in han ngaihtuah teh le. Nu leh pa, pi leh pu te atang pawh a Lo lamah pawh khaichhuah ngai fo chhungkua, khawvel lo changkang hretah pawh BPL kalsan hleitheilo chhungkua atanga lo piangchhuak a, lo seilian tan chuan ava beidawnthlak tak em.


Khawvel eng an rawn hmuve tawh laklawh si, “Survival of the fittest” tihna khawvelah hian beih ava ngai nasa dawn bik em. Anlo thanglian ve deuh a zirna run an rawn kai tan ve tih in, thlahtute atang tawha lehkha thiam chhungkua nilo sa bawk nen "Simple Pass" hi an chan tawk a ni nghal ringawt mai. Chu a karah naupang thuawihlo deuh, luhlul deuh, bal bawk si anla nizui. Thiante velh hrat deuh mi nu leh pa ten an zilh fo, an lo len deuh pawh a Valupa leh YMA ten an zilh ngai fo anlo ni chho leh zel bawk nen. Hmalam hun kawhhmuh thiam nu leh pa nei ve heklo. Nu leh pa pawh ziak leh chhiar thiam tawk tawk an ni chauh bawk nen. Ava beidawnthlak tak em….


Anlo lian ve deuh deuh a, ruihtheih thil thing deuh deuh ti nasa sa anla ni zui leh zel a, High School kal lai phei chuan School tlanbo te chu a hrat hrat an la ni zui, ava buaithlak em. College pawh kal mumalloin zirna chu anla chawlhsan zui bawk nen. An pumrua alo len ve uiah a vangin an chhungte lah chuan hnathawk atan anlo awt ve em em tawh bawk nen an tan chuan a awmve tho bawk a.


Kan khawvel hmasawnna kalzelah hian engtin tak hmalak zel tum ang maw..? Sawrkar hna lah chu van a rah ang a ni mai si an tan chuan, sumdawnna lamah han kal dawn se nieh neisa tan lo chuan hlawhtlinna lamtluang zawh ava huphurhawm tak em. Kuthnathawh ringawt emaw, mi hnuaia thawk ringawt chung chuan engtin nge nupui fanau neiin he khawvel hi an hmachawn tak ang le?


An hun kal tawh a an nundan te chuan in ngaihtuah nasat tir viau mahse in siamtha turin khua a tlai tawh ting tang bawk si. Anlo nundan ngaihtuah chuan malsawmna dawngtlak pawh an inti bik kherlo ang.


Pathian thilsiam ropui zia te pawh min hriatchhauh tir hial zawk in ka hria. He kan khawvel hun tawn hmawr tawh tak, Jordan Lui dai kai tawh nun ah hi chuah malsawmna hi kan thawh chhuah a ngai alo nisi a. Kan thawhrah liau liau hi kan seng dawn si a. Han ngaihtuah ve teh tawngtai tawngtai ringawt hi ava tawk tawh lo em. Nangmah kha han inngaihtuah la engvangin nge ila dam reng ni? Mi tamtak rapthlak tak tak a an thihna leh chhiahna rapthlak tak tak thlenna ram ah hian enge I dam chhan? Eng vangin nge ala zuahve reng che ni? Ngaihtuah chung zelin I nun kha siamthat han tum teh. I thiamna te kha nangmah siamtu tan hian han hmang ve ta che. Tunge maw I nih a a hriat reng che le….?

4 comments:

  1. Tunge maw ka nih a, min hriat reng chu le? tih zawhna hi ka in zawt zing ve ta khawp mai! A malsawmna ka phu lohva ka dawn thin te, harsatna ka tawh pawh a min thlahthlam ngai reng reng lo ka Lalpa hian eng atan nge maw min duh a, heti tak mai a ka dil em em vang pawh ni lova, ka nun a kaihhruai thin hi le! Lalpa, i duh chu tu emaw hmang hian min hriattir ta che, i chhiahhlawh hian ka ngaithla e!

    ReplyDelete
  2. Kristian chhungkaw dik tak atanga rawn zi chhuak, Pathian thu leh fuihna thu tha tak tak hmanga enkawl chhoh mihring chu, a hringnun kawng hi a tluang chho purh thin. Enge maw changin tluk chhiat zauh chang pawh nei mahse, mahni leh mahni inen letin rang tain a insiam tha mai thin. Chhungkaw tha din hi naupang thang lian zel tur tan a va lo pawimawh tak em.

    Broken family atanga rawn chawr chhuak naupang te, zirna lam kaihhnawih reng reng eng vaka ngai lo chhungkua, zirna environment reng reng awm lohna chhungkua te, chhungkaw buai reng atanga rawn zi chhuak naupang te erawh an kawng zawh a khirh em em thin. Zirna lamah pawh rual an pawl tak tak thei thin lo.

    Thingtlangpa fapa rethei ve tak chhungkua atang chuan lehkha zir a harsat chasng a tam khawp ang le. Zirna in a kentel chu "sum hmanral" a ni miau si a. Sang tak thlenga zir chu a harsat viau ka ring thin. Hnalak hunah lah hawpui zirna tha ber ber atanga chhuak te nen an in compete dawn a nia. Hna hmu lova awm tawp kha an hmabak a ni tho tho. Hnalak ah te pawh hian "thingtlang quotq" awm thei se ka ti khawp mai.

    ReplyDelete
  3. Thingtlang pa tan chuian an fate chu sangtak thlengin zirtir an duh ve ngei a,mahse an neihin a tlin miau loh avaangin an thei thinlo a ni...kan sawrkar lam pawh hian heng mite hi han ngaihven deuhse ava ropui dawn em...i ngaihdan khi ka tawmpui khawp mai che....

    ReplyDelete
  4. Tha khawp mai. A bul a tanga a tawp thleng hian kei pawn ka ngaih tuah nasa ve thin tun thleng hian. Thu ziak tha tak a ni. Chhiar a hahdam bawk.

    ReplyDelete

I ngaihdan sawive hun.